ជិតគ្រប់ខែ! អ្នកម៉ាក់ហាមធ្វើរឿងទាំង៤នេះ ទើបងាយស្រួល ពេលសម្រាល
ការឆ្លងទន្លេរបានឆាប់រហ័ស និងមានភាពងាយស្រួល ឬពិបាក ក៏អាស្រ័យទៅលើការថែទាំសុខភាពរបស់អ្នកម៉ាក់ផងដែរ ជាពិសេសគឺពេលជិតដល់ថ្ងៃសម្រាល។ សកម្មភាពប្រចាំថ្ងៃមួយចំនួនគឺជាដើមហេតុដែលអាចបណ្តាលឱ្យអ្នកម៉ាក់ជួបការលំបាកខ្លាំង ក្នុងពេលសម្រាល។
តើមានចំណុចអ្វីខ្លះដែលអ្នកម៉ាក់មិនត្រូវធ្វើពេលពពោះ?
ខាងក្រោមនេះ យើងនឹងបង្ហាញអ្នកពីរឿងដែលអ្នកម្តាយគួរតែប្រយ័ត្ន ទើបមិនធ្វើឲ្យអ្នកពិបាកឆ្លងទន្លេ៖
១. កុំធ្វើការដោយគ្មានពេលសម្រាក
ក្នុងពេលជិតគ្រប់ខែ អ្នកម្តាយមិនគួរធ្វើការនឿយហត់ពេកទេ ដោយការងារផ្ទះទាំងអស់ គួរតែទុកឲ្យប៉ាៗជាអ្នកធ្វើ ព្រោះពេលដែលអ្នកនឿយហត់ពេក នឹងធ្វើឲ្យអ្នកម៉ាក់គ្មានកម្លាំងក្នុងពេលបង្កើតកូនទេ។
តាមក្បួនពេទ្យ គេឲ្យស្រីៗដែលត្រៀមសម្រាលកូន សម្រាកពីការងារ ១ខែ ឬកន្លះខែមុន ដើម្បីត្រៀមថាមពលទុកពេលសម្រាលកូន។
២. មិនត្រូវធ្វើដំណើរផ្លូវឆ្ងាយ
ចាស់ៗពីដើម ហាមដាច់ខាតរឿងធ្វើដំណើរផ្លូវឆ្ងាយពេលពពោះ ព្រោះនាំឲ្យអស់កម្លាំងទាំងម្តាយទាំងកូន ហើយបើឈឺពោះចំពេលកំពុងធ្វើដំណើរទៀត វីវរធំហើយមិនដឹងទៅរកពេទ្យនៅឯណាទេ ឯសម្ភារៈក៏គ្មានតាមខ្លួនទៀត។
៣. មិនត្រូវគិតច្រើន ឬបារម្ភច្រើនឡើយ
ក្នុងពេលដែលអ្នកម្តាយជិតគ្រប់ខែ អារម្មណ៍របស់អ្នកត្រូវតែសប្បាយ មិនភ័យខ្លាច មិនបារម្ភច្រើន ព្រោះពេលដែលអារម្មណ៍របស់អ្នកតែងស្ថិតក្នុងការភ័យខ្លាច នឹងធ្វើឲ្យអ្នកគេងមិនលក់។ ពេលដែលអ្នកគេងមិនលក់ សុខភាពរបស់អ្នកនឹងចុះខ្សោយ ដោយអាចធ្វើឲ្យប៉ះពាល់ដល់ការសម្រាលដោយធម្មជាតិបានយ៉ាងងាយ។
៤. កុំបំប៉នអាហារពេក
ខ្វះតែ ២-៣ អាទិត្យទៀតដល់ថ្ងៃសម្រាល បើកូនគ្រប់គីឡូហើយ ម៉ាក់ៗមិនអាចប៉ូវអាហារគ្រប់មុខ និងច្រើនៗ ដូចមុននោះទេ គឺអាចឡើងគីឡូលឿន ឯកូនក្នុងពោះក៏ថ្លោសខ្លាំងទៅតាមនោះដែរ។ កាលណាកូនថ្លោសខ្លាំងពេក ចំណែកម៉ាក់ៗមានអាងត្រគាកតូចទៀត នាំឲ្យពិបាកសម្រាលតាមធម្មជាតិ។
ជារួមមកវិញអ្នកម៉ាក់ត្រូថែរក្សាសុខភាពឱ្យបានល្អ និងត្រូវយកចិត្តទុកដាក់ទៅលើចំណុចទាំង ៤ចំណុចខាងលើ ជាពិសេសគឺទទួលទានអាហារដែលមានផ្តល់វីតាមីន និងសារធាតុចិញ្ចឹមច្រើន ដើម្បីជំនួយដល់កម្លាំង ព្រមទាំងងាយស្រួលក្នុងការសម្រាលក្នុងពេលឆាប់ៗខាងមុខ៕
