រោគសញ្ញាជំងឺកូវីដ-19 ដែលកើតជាទូទៅចំពោះកុមារ ខុសពីមនុស្សពេញវ័យ

ខណៈអត្រាឆ្លងវីរុសកូរ៉ូណាលើកុមារ កំពុងកើនឡើងយ៉ាងខ្លាំងនៅទូទាំងប្រទេសអង់គ្លេស រោគសញ្ញាដែលអាចកើតមានចំពោះកុមារគឺខុសគ្នាទៅនឹងមនុស្សពេញវ័យ។

ថ្វីបើកុមារមានហានិភ័យតិច នៅពេលនិយាយអំពីផលវិបាកនៃវីរុសនេះក៏ដោយ មានករណីមួយចំនួនដែលអ្នកជំងឺវ័យក្មេងត្រូវការការព្យាបាលនៅមន្ទីរពេទ្យ។

ចំពោះមនុស្សពេញវ័យ រោគសញ្ញាចម្បងគឺឡើងកម្តៅខ្លាំង ក្អកនិងលែងដឹងរសជាតិនិងក្លិន។ ហើយមនុស្សពេញវ័យដែលឈឺយូរក៏មានរោគសញ្ញាដូចជាឈឺក្បាល អស់កម្លាំង វិលមុខនិងមានបញ្ហាខួរក្បាលផងដែរ ប៉ុន្តែសញ្ញាសំខាន់ៗចំពោះកុមារគឺខុសគ្នាបន្តិចបន្តួច។

យោងតាមទិន្នន័យពី ZOE Symptom Tracker App បានឲ្យដឹងថា ភាពអស់កម្លាំងត្រូវបានចុះបញ្ជីថាជារោគសញ្ញាសំខាន់មួយក្នុងចំណោមកុមារដែលផ្ទុកវីរុសកូរ៉ូណា។ លើសពីនេះ កុមារក៏ឈឺក្បាល ឈឺបំពង់កនិងបាត់បង់ចំណង់អាហារផងដែរ។

១. មានអាការៈឈឺ​ក

យោងទៅតាមកម្មវិធីតាមដានរោគសញ្ញានេះបានឲ្យដឹងថា ៣៨ភាគរយនៃកុមារកើតកូវីដបានរាយការណ៍ថា ឈឺបំពង់ក។

២. ការបាត់បង់ចំណង់អាហារ

ទិន្នន័យបានបង្ហាញថា ៣៥ភាគរយនៃកុមារដែលកើតកូវីដត្រូវបានគេរាយការណ៍ថា ទទួលរងនូវបញ្ហាបាត់បង់ចំណង់អាហារ។

យោងតាមគ្រូពេទ្យបានឲ្យដឹងថា ទារកអាយុតិចជាងមួយឆ្នាំដែលធ្វើតេស្តវិជ្ជមានចំពោះជំងឺកូវីដ១៩ ទំនងជាទទួលរងនូវរោគសញ្ញានេះ។

អ្នកឯកទេសខាងគ្រូពេទ្យកុមារបានណែនាំឲ្យមាតាបិតា ព្យាយាមបំបែកអាហាររបស់កូនឲ្យទៅជាចំណែកតូចៗ ផ្តល់អាហារឲ្យពួកគេតិចតួចហើយប្រសិនបើអាចធ្វើទៅបាន ផ្តល់អាហារនៅពេលពួកគេមិនស្រួលខ្លួន។

៣. មានអាការៈគ្រុនក្តៅ

គ្រុនក្តៅក៏ជារោគសញ្ញាមួយក្នុងចំណោមរោគសញ្ញាសំខាន់ៗ ដែលត្រូវយកចិត្តទុកដាក់ចំពោះកុមារដែលសង្ស័យថាមានវីរុសកូរ៉ូណាផងដែរ។

ចំពោះមនុស្សធំនិងកុមារដែលមានអាយុលើសបីខែ កម្តៅលើ៣៧អង្សារត្រូវបានចាត់ទុកថាខ្ពស់។

ចំពោះកុមារនិងទារកដែលមានសីតុណ្ហភាពខ្ពស់ NHS បានណែនាំថា ទារកគួរតែទទួលបានជាតិរាវឲ្យបានច្រើនដូចជាទឹកដោះម្តាយឬទឹកដោះគោ។

ទោះបីជាកូនរបស់អ្នកមិនស្រេកទឹកក៏ដោយ ចូរព្យាយាមឲ្យពួកគេផឹកតិចៗដើម្បីរក្សាកម្រិតជាតិរាវនៅក្នុងខ្លួនពួកគេឲ្យបានខ្ពស់។

៤. មានអាការៈឈឺក្បាល

យោងតាមកម្មវិធី ZOE Symptom Tracker បានឲ្យដឹងថា កុមារចំនួន៥៣ភាគរយបានរាយការណ៍ថា មានអាការៈឈឺក្បាលបន្ទាប់ពីធ្វើតេស្តវិជ្ជមានវីរុសកូរ៉ូណា។

សាស្រ្តាចារ្យ Anne MacGregor និយាយថា កុមារដែលឈឺក្បាលច្រើនតែទទួលរងបញ្ហាក្រពះក្នុងពេលតែមួយ ហើយបានណែនាំឪពុកម្តាយឲ្យសួរកូនថា តើក្បាលរបស់ពួកគេឈឺដែរឬទេប្រសិនបើពួកគេត្អូញត្អែរពីការឈឺបំពង់ក។

៥. មានអាការៈអស់កម្លាំង

ភាគច្រើននៃកុមារដែលកើតកូវីដបានរាយការណ៍ថា អស់កម្លាំង។

ទិន្នន័យបង្ហាញថា កុមារចំនួន៥៥ភាគរយបានទទួលរងពីរោគសញ្ញាចុះខ្សោយ។ កុមារដែលទើបចេះដើរក៏អាចងាយនឹងឆាប់ខឹងនិងយំច្រើនផងដែរ។

ភាពអស់កម្លាំងក៏ត្រូវបានចុះបញ្ជីថាជារោគសញ្ញាយូរអង្វែងចំពោះមនុស្សពេញវ័យផងដែរ។

មនុស្សពេញវ័យជាច្រើនបាននិយាយថា ពួកគេអស់កម្លាំងរយៈពេលច្រើនសប្តាហ៍ឬរាប់ខែបន្ទាប់ពីពួកគេជាសះស្បើយពីជំងឺកូវីដ១៩៕

ប្រភព៖ Mirror