សម្រាលកូនដោយវះកាត់! តើពេលណាយកកូនមួយទៀតល្អ?
បើគិតដល់រឿងឆ្លងទន្លេ គឺការសម្រាលកូនដោយធម្មជាតិ ប៉ុន្តែសម័យបច្ចុប្បន្ន ប្រហែលមិនដូច្នេះទាំងស្រុងទេ។ “ការវះកាត់” ជាវិធីសាស្ត្រមួយដ៏ពេញនិយមសព្វថ្ងៃនេះ។ ការផ្ដល់កំណើតដោយប្រើមុខកាំបិតនេះ ជាការវះកាត់តូចមួយនៅលើពោះ និងស្បូនម្ដាយ។ ក្នុងករណីស្បូនស្ត្រីមិនបើក (បើកមិនអស់) សុខភាពម្ដាយខ្សោយ ឬមានជំងឺ ការវះកាត់ជាវិធីល្អបំផុត ក្នុងការផ្ដល់សុវត្ថិភាពទាំងម្ដាយទាំងកូន។
វះកាត់ ប្រាកដជាមិនដូចវិធីកើតបែបធម្មជាតិទេ។ បែបធម្មជាតិ ស្រីៗអាចយកកូនបានច្រើន និងញឹកបាន។
តើគួររង់ចាំយូរប៉ុនណា ឬរយៈពេលណា ទើបអាចមានកូនបន្ទាប់ទៀតបាន?
ខាងក្រោមនេះអ្នកម៉ាក់នឹងបានស្វែងយល់បន្ថែមអំពីរយះពេលដែលអ្នកគួរសម្រេចចិត្តយកកូនមួយទៀត៖

១. ពេលវេលាក្រោយវះ
អត់ខុសអីពីស្រីៗដែលឆ្លងទន្លេដោយធម្មជាតិទេ រយៈពេលដែលល្អ ក្នុងការចាត់ចែងយកកូនបន្ទាប់ហោចណាស់ចាប់ពី ៦ខែ -២ឆ្នាំ។ រឿងមួយត្រូវចាំ គឺ អាស្រ័យលើសុខភាព រាងកាយម្ដាយ។ បើរាងកាយរឹងមាំ ប្រាកដជាមានសុវត្ថិភាពក្នុងការយកកូនបន្ទាប់ម្នាក់ទៀតបាន។
ការរង់ចាំ រាងកាយដែលឆ្លងកាត់មុខកាំបិតលើកទី១ នឹងព្យាបាលខ្លួនឯង ដោយបំពេញនូវសារធាតុចិញ្ចឹមដែលបាត់បង់ និងចាប់ផ្ដើមផលិតទឹកដោះ ទុកសម្រាប់ទារកក្រោយ។ ស្រ្ដីដែលជ្រើសរើសការវះកាត់ បាត់បង់ឈាមច្រើនជាង សម្រាលបែបធម្មជាតិ ២ដង។
២- ការប្រែប្រួល និងបញ្ហា
ការៈអស់កម្លាំង តានតឹងអារម្មណ៍ (មួម៉ៅ) និងឈឺពេញខ្លួន ដូចជាឈឺខ្នង ឈឺចុងសុដន់ ឬឈឺសាច់ពោះជាច្រើនសប្ដាហ៍ ជាអ្វីដែលអាចកើតឡើងក្រោយវះ។ ក្នុងករណីឆាប់មានកូនបន្ទាប់ពេក ក្រោយពីសម្រាលហើយថ្មីៗ ស្រីៗយើងអាចមានបញ្ហាក្រោយសម្រាលកូន (បន្ទាប់) ដូចជា៖
- ដាច់ភ្នាសស្បូន
- ទារកកើតមុនពេលកំណត់ ឬ
- ទារកកើតមកមិនគ្រប់គីឡូ (ក្រោម ២គីឡូក្រាម)។

យកល្អ ហោចណាស់ (យកកូនបន្ទាប់) កុំឲ្យតិចជាង ១៨ខែ ព្រោះទុកពេលឲ្យរាងកាយសះល្អ និងទុកគម្លាត ឬដាក់ផែនការកំណត់យកកូន។ ជាក់ស្ដែងចំពោះស្រ្ដីមួយចំនួន អាយុលើស ៣០ឆ្នាំ មិនគួរយកកូន កៀកគ្នាទេ ព្រោះអាចពិបាកបង្កកំណើត។
ការយកកូនមួយទៀតគឺ អាស្រ័យលើស្ថានភាពសុខភាពម្នាក់ៗ កត្តារាងកាយ និងលក្ខខណ្ឌ ផ្សេងទៀត។ ចម្លើយដែលល្អ សម្រាប់លក្ខខណ្ឌ យើងម្នាក់ៗ គួរតែ ទៅជួបពេទ្យ សួរនាំ និងសុំយោបល់ ពីពេទ្យជំនាញជាក់ស្ដែង ដើម្បីចៀសវាង មានបញ្ហាណាមួយដោយយថាហេតុ។
ប្រភព៖ Hello Krupet