ប្រសើរខ្លាំងណាស់! វិធីទាំង ៥ យ៉ាងក្នុងការថែទាំ និងការពារសុខភាពរបស់ទារកពីជំងឺគ្រុនផ្ដាសាយ

រដូវរងារជារដូវដែលមនុស្សភាគច្រើនជាពិសេសទារកតែងតែកើតនូវអាការៈក្ដៅខ្លួន​ផ្ដាសាយ​ ហៀរសំបោរ ពិបាកដកដង្ហើមជាដើម។​ ឪពុកម្ដាយរបស់ទារកទាំងអស់តែងតែមានការព្រួយបារម្ភជាខ្លាំងចំពោះសុខភាពរបស់កូនៗរបស់ពួកគាត់ហើយ ពួកគាត់គ្មានវិធីសាស្ត្រគ្រប់គ្រាន់​ក្នុងការថែទាំ​ និងការពារសុខភាពរបស់កូនៗពីជំងឺគ្រុនក្ដៅ និងផ្ដាសាយនោះទេ។

តើមានវិធីអ្វីខ្លះដើម្បីជួយថែទាំ និងការពារសុខភាពរបស់ទារកពីជំងឺគ្រុនផ្ដាសាយ?

ដូចនេះ​ ពេទ្យយើងសូមលើកយកវិធីសាស្ត្រទាំង ៥ យ៉ាងក្នុងការថែទាំ​ និងការពារសុខភាពរបស់ទារកពីជំងឺគ្រុនក្ដៅ និងផ្ដាសាយ៖

១.​​​​ ការដាក់ទារកគេងឲ្យបានត្រឹមត្រូវ

លោកអ្នកត្រូវពិនិត្យឲ្យបានម៉ត់ចត់ពីទីតាំងគេងរបស់ទារកដូចជា​ ខ្យល់ចេញចូលពីបង្អួច ពីកង្ហារ ម៉ាស៊ីនត្រជាក់ជាដើម​។​​ នៅពេលដែលរៀបកន្លែងឲ្យទារកគេង សូមពិនិត្យមើលអំពីអនាម័យកម្រាលគេង ធូលីដីជាដើមព្រោះវត្ថុទាំងអស់នេះអាចបង្កឲ្យទារកមានជំងឺផ្ដាសាយបាន។ មិនត្រឹមតែប៉ុណ្ណោះ លោកអ្នកត្រូវរុំទារកជាមួយនឹងក្រណាត់ទន់​ ហើយស្អាតដើម្បីផ្ដល់កម្ដៅដល់ទារក។

២. អនុវត្តវិធានអនាម័យ

ការប៉ះទារកជាមួយនឹងដៃកខ្វក់ អាចបង្កឲ្យទារកងាយកើតរោគផ្ដាសាយបំផុត។ ទារកមានប្រព័ន្ធការពារសុខភាពខ្សោយជាងមនុស្សចាស់ដែលអាចឲ្យមេរោគងាយជ្រៀតចូល និងបង្កជំងឺ។ ដូចនេះអ្នកដែលថែទាំទារក​គួរមានអនាម័យខ្លួនប្រាណ ជាពិសេសលាងដៃឲ្យបានស្អាតមុននឹងប៉ះទារក។ មិនតែប៉ុណ្ណោះ សម្ភារៈប្រើប្រាស់របស់ទារកត្រូវលាងសំអាតរៀងរាល់ពេលប្រើប្រាស់រួចដើម្បីការពារមេរោគពីទារក។

៣. នៅឲ្យឆ្ងាយពីអ្នកមានអាការៈផ្ដាសាយ

ដោយសារប្រព័ន្ធការពារសុខភាពមិនទាន់មានភាពរឹងមាំនៅឡើយ ឪពុកម្ដាយ ឬអ្នកថែទាំទារកគួរឲ្យទារកនៅគម្លាតឲ្យឆ្ងាយពីអ្នកជំងឺ។ ប្រសិនបើលោកអ្នកត្រូវមើលថែទារកតែមានអាការៈផ្ដាសាយ លោកអ្នកគួរពាក់ម៉ាស់​​​​ និងលាងសំអាតដៃជើងរបស់លោកអ្នកមុនចូលទៅមើលថែទារកហើយត្រូវព្យាបាលជំងឺនេះឲ្យបានឆាប់រហ័ស ជៀសវាងមានការចម្លងទៅទារក។

៤. បំបៅទឹកដោះដល់ទារកឲ្យបានច្រើន

ទឹកដោះម្ដាយគឺជាអាហារចម្បងមួយសម្រាប់ទារកក្នុងការលូតលាស់ និងជួយឲ្យទារកសុខភាពល្អ​ មិនងាយឆ្លងជំងឺផ្សេងៗ។​​ អ្នកម្ដាយគួរបំបៅទារកឲ្យបានឆ្អែតដើម្បីផ្ដល់វីតាមីនល្អៗដល់ទារកមានប្រព័ន្ធការពារសុខភាពរឹងមាំ​​​ និងមិនងាយមានជំងឺ។ ប្រសិនបើជាម្ដាយមិនអាចបំបៅដោះបាន អ្នកម្ដាយត្រូវពិភាក្សា​ជាមួយនឹងគ្រូពេទ្យជំនាញណាមួយដើម្បីស្វែងរកវិធីសាស្ត្រផ្សេងៗដែលជួយឲ្យទារកមានសុខភាពរឹងមាំ​​​ល្អ មិនងាយឆ្លងជំងឺ។

៥. ជៀសវាងទីសាធារណៈ

ប្រសិនបើមិនចាំបាច់ សូមកុំយកទារកចេញក្រៅផ្ទះច្រើនពេក។​ ព្រោះថាទីសាធារណៈគឺជាបណ្ដុំមេរោគចម្រុះដែលវាជាគ្រោះថ្នាក់មួយសម្រាប់សុខភាពទារក។​ ជាពិសេសនៅពេលអាកាសធាតុចុះត្រជាក់​ ទារកងាយនឹងមានអាការៈក្ដៅខ្លួន​ និងផ្ដាសាយ​ ដូចនេះលោកអ្នកត្រូវប្រុងប្រយ័ត្នជានិច្ចនៅពេលយកទារកចេញខាងក្រៅ។

៦.​​​ តាមដានសុខភាពឲ្យបានទៀងទាត់

តាមដានសុខភាពទារកដោយការពិនិត្យកម្ដៅ រោគសញ្ញាផ្សេងៗដូចជាហៀរសំបោរ​​ ក្ដៅខ្លួន​​​​ ការបៅ និងគេងរបស់ទារកជាដើម។ ប្រសិនបើទារកមានកម្ដៅលើសពី 37.5 អង្សារសេ ឬមានអាការៈបៅមិនបាន គេងមិនលក់សូមទាក់ទងទៅកាន់មន្ទីរពេទ្យឲ្យបានឆាប់រហ័ស​ដើម្បីទទួលការព្យាបាលឲ្យបានទាន់ពេលវេលា។

 ប្រភព៖ verywellhealth