ពិសេសណាស់! ផ្លែសារី ល្អបំផុតសម្រាប់ស្ត្រីពពោះ និងកូនក្នុងផ្ទៃ
ផ្លែសារី មានសុវត្ថិភាពខ្ពស់នៅក្នុងអំឡុងពេលមានគភ៌ ពីព្រោះវាមានកាឡូរីទាប និងមានផ្ទុកសារធាតុចិញ្ចឹមច្រើន។ ដូច្នេះហើយ ម៉ាក់ៗគួរបញ្ចូលផ្លែសារីទៅក្នុងរបបអាហារប្រចាំថ្ងៃ ដោយការញ៉ាំផ្ទាល់ ឬធ្វើជាទឹកក្រឡុកផ្លែសារីជាដើម ដើម្បីទទួលបានអត្ថប្រយោជន៍ដ៏ច្រើនលើសលប់ចំពោះសុខភាពម្ដាយ និងទារកក្នុងផ្ទៃ។
តើផ្លែសារីមានប្រយោជន៍អ្វីខ្លះដល់អ្នកពពោះ?
ខាងក្រោមនេះយើងនឹងបង្ហាញអំពីលក្ខិណៈពិសេសនៃផ្លែសារីដែលអ្នកពពោះអាចញុំាបានហើយមានគុណប្រយោជន៍ថែមទៀត៖
១. ហ្វូឡេត
ពិតណាស់ នៅអំឡុងពេលពពោះ ម៉ាក់ៗត្រូវការហ្វូឡេត(Folate) ឬអាស៊ីដហ្វូលិកយ៉ាងច្រើន ហើយអាហារដែលមានផ្ទុកអាស៊ីដហ្វូលិកនេះមានតិចតួចប៉ុណ្ណោះ ដូច្នេះហើយ ទើបគ្រូពេទ្យភាគច្រើនណែនាំឲ្យស្ត្រីក្នុងវ័យអាចមានកូនបាន ញ៉ាំអាហារបំប៉នដែលផ្ទុកអាស៊ីដប្រភេទនេះជាប្រចាំ។ នៅក្នុងត្រីមាសដំបូងនៃការពពោះ អាស៊ីដហ្វូលិកមានសារសំខាន់ណាស់ ពីព្រោះវាអាចការពារបញ្ហាខូចទ្រង់ទ្រាយខួរក្បាលពីកំណើតរបស់ទារកបាន។ យ៉ាងណាមិញ សម្រាប់ផ្លែសារីមួយផ្លែមានផ្ទុកហ្វូឡេតប្រហែល១៤មីក្រូក្រាម ហើយស្ត្រីពពោះត្រូវការហ្វូឡេត៦០០មីក្រូក្រាមក្នុងមួយថ្ងៃ។
២. វីតាមីនC
ជាមួយគ្នានេះដែរ ផ្លែសារីសម្បូរទៅដោយវីតាមីនC ហើយផ្លែសារីមួយផ្លែមានផ្ទុកវីតាមីនCប្រហែល១០មិល្លីក្រាម។ ចំពោះស្ត្រីមានផ្ទៃពោះគប្បីទទួលបានវីតាមីនC ប្រចាំថ្ងៃចំនួន៨៥មិល្លីក្រាម និងអ្នកដែលពុំមានទម្ងន់ ត្រូវការវីតាមីននេះចំនួន៧៥មិល្លីក្រាមក្នុងមួយថ្ងៃ។ ពិតណាស់ វីតាមីនCជួយដល់រាងកាយក្នុងការប្រយុទ្ធប្រឆាំងនឹងការឆ្លងមេរោគ ដែលវាមានសារសំខាន់យ៉ាងខ្លាំង ជាពិសេសនៅអំឡុងពេលមានគភ៌នេះ។ ម៉ាក់ៗអាចញ៉ាំផ្លែសារីជាមួយអាហារដែលមានជាតិដែកខ្ពស់ដូចជាបាយ សណ្ដែក ឬសាច់ជាដើម ដើម្បីជួយឲ្យរាងកាយរបស់យើងស្រូបយកជាតិដែកបានល្អ។
៣. ជាតិសរសៃ
បន្ថែមពីនេះ ផ្លែសារីគឺជាប្រភពអាហារជាតិសរសៃដ៏ល្អបំផុត ដែលអាចជួយកាត់បន្ថយការទល់លាមក ដែលជារោគសញ្ញាទូទៅរបស់ស្ត្រីពពោះបានយ៉ាងមានប្រសិទ្ធភាព។ ប្រសិនបើម៉ាក់ៗកំពុងតែញ៉ាំអាហារបំប៉នជាតិដែកអំឡុងពេលពពោះនេះ ម៉ាក់ៗគប្បីញ៉ាំអាហារដែលមានជាតិសរសៃខ្ពស់ឲ្យបានច្រើន។ ការញ៉ាំផ្លែសារីទាំងសំបក នឹងធ្វើឲ្យយើងទទួលបានបរិមាណជាតិសរសៃខ្ពស់បំផុត។ យោងតាមUSDA ផ្លែសារីមានផ្ទុកជាតិសរសៃចំនួន៧ក្រាមក្នុងមួយផ្លែ។
៤. កាឡូរី
ឡុងពេលពពោះ យើងចាំបាច់ត្រូវយកចិត្តទុកដាក់ខ្ពស់ជាមួយនឹងការស្រូបយកកាឡូរីទៅក្នុងរាងកាយ ដើម្បីជៀសវាងការឡើងទម្ងន់ជ្រុល ប៉ុន្តែចំពោះផ្លែសារីនេះ គឺពុំបង្កឲ្យមានការកើនទម្ងន់ឡើយ។ ផ្លែសារីមួយផ្លែមានផ្ទុកកាឡូរីចំនួន១៤៣។ ដោយសារតែផ្លែឈើមួយប្រភេទនេះសម្បូរទៅដោយជាតិសរសៃខ្ពស់ ដូចនេះ វាគឺជាអាហារសម្រន់ដែលមានកាឡូរីទាប ដែលអាចផ្ដល់ថាមពលដល់ម៉ាក់ៗពេញមួយថ្ងៃ។ លើសពីនេះ ផ្លែសារីក៏ផ្ទុកកាបូអ៊ីដ្រាតធម្មតាចំនួន២ គឺFructose និងគ្លុយកូសដែលជួយសម្រួលដល់ការរំលាយអាហារ និងផ្ដល់ថាមពលដ៏អស្ចារ្យនៅក្នុងអំឡុងពេលពពោះថែមទៀតផង។
ដកស្រង់ពី៖ Hello Krupet
