កូនតូចៗចេះតែរលាកគូទអាចមកពីមូលហេតុទាំងនេះ តែកុំបារម្ភនេះជាដំណោះស្រាយ
ក្មេងតូចៗ ពិសេសក្មេងស្លៀកខោទឹកនោម ងាយនឹងរលាកគូទណាស់។ ចំពោះមូលហេតុធ្វើឲ្យក្មេងឧស្សាហ៍រលាកគូទវិញ មានច្រើន ដូចជាក្មេងរាកញឹកញាប់ ការមិនបានលាងសម្អាតគូទកូនឲ្យបានស្អាតល្អពេលនោម ឬជុះ ផ្អាប់កន្ទបកូនទុកយូរពេក កូនអាលែកហ្ស៊ីជាមួយកន្ទប ឬខោទឹកនោម ឆ្លងមេរោគផ្សិត បាក់តេរី ឬវីរុស ជាដើម។
តើត្រូវដោះស្រាយបែបណាពេលកូនតូចរលាកគូទ?
- ត្រូវលាបក្រែមជុំវិញបរិវេណគូទកូន ក្រោយសម្អាតគូទ ឬងូតទឹករួច
- ឲ្យកូនញ៉ាំទឹកឲ្យច្រើន
- ឲ្យកូនតមអាហារដែលមានជាតិខ្លាញ់ ហឹរ ឬផ្អាប់
- ធ្វើអនាម័យរាងកាយ និងគូទកូនជាប់ជាប្រចាំ
- ជ្រើសរើសកន្ទប ឬខោទឹកនោម ដែលទន់ ហើយជក់ទឹក
- ត្រូវផ្លាស់ប្តូរកន្ទបកូនឲ្យញឹកញាប់។
ចំពោះក្មេងរលាកគូទដោយសារខោទឹកនោមវិញកុមារ នៅពេលថ្ងៃមិនបាច់ស្លៀកខោទឹកនោមឲ្យកូនទេ ហើយត្រូវ៖
- ក្រោយកូនជុះ ឬនោមត្រូវលាងសម្អាតជាមួយទឹកក្ដៅឧណ្ហៗ ឬទឹកត្រជាក់ធម្មតា
- បន្ទាប់មកជូតសម្អាតគូទកូនដោយកំណាត់ស្ងួត ទន់
- ផ្លាស់ប្ដូរខោទឹកនោមឲ្យបានញឹកញាប់
- បើមិនចាំបាច់ កុំប្រើកន្សែងសើមជូតអី ព្រោះងាយប្រតិកម្ម
- ពេលកូនបត់ជើងធំ ត្រូវប្រញាប់ដូរភ្លាម កុំផ្អាប់ទុកយូរ។
ទារកទើបកើតច្រើនណាស់កើតរោល រមាស់ ព្រោះសាច់ខោទឹកនោមមានសារជាតិគីមី ហើយសារជាតិគីមីនេះបានទៅប៉ះទឹកនោមធ្វើឲ្យមានប្រតិកម្មស្បែកជួបប្រទះក្រហម រោល ឬកន្ទួល។ មួយវិញទៀតអាចបណ្ដាលមកពីម៉ាក់ៗទុកយូរពេកមិនដូរ ជាពិសេសពេលយប់តែម្ដង ដោយសារតែអត់ងងុយ និងខ្ជិលនោះ ទើបម៉ាក់ៗខ្លះបណ្ដោយឲ្យកូនស្លៀកខោតែ១ ក្នុងមួយយប់។
ដកស្រង់ពី៖ Hello Health Group
