៤ ចំណុចធំៗ គ្រូពេទ្យហាមដាច់ខាតចំពោះស្ត្រីមានផ្ទៃពោះ
អំឡុងមានផ្ទៃពោះ ស្រីៗមានរឿងត្រូវប្រយ័ត្នច្រើន ដើម្បីថែរក្សាសុខភាពខ្លួន និងកូនក្នុងផ្ទៃឲ្យបានលូតលាស់ល្អ ដែលក្នុងនោះមានទាំងក្បួនចាស់បុរាណ និងក្បូនពេទ្យ។
តើមានចំណុចអ្វីខ្លះដែលស្ត្រីពពោះមិនគួរធ្វើ?
ពេលពពោះអ្នកគ្រាន់តែចៀសឲ្យបានប៉ុន្មានចំណុចខាងក្រោមនេះ៖
១. ហាមប្រើថ្នាំដោយគ្មានវេជ្ជបញ្ជា
មានជំងឺអ្វីមួយ ហើយចង់ប្រើថ្នាំ ស្ត្រីមានផ្ទៃពោះចាំបាច់ត្រូវពិគ្រោះជាមួយគ្រូពេទ្យ ព្រោះការប្រើថ្នាំផ្តេសផ្តេស ដោយគ្មានវេជ្ជបញ្ជា អាចនឹងមានផលប៉ះពាល់ដល់កូនក្នុងពោះ។
២. ហាមជក់បារី
ជាតិនីកូទីន និងសារធាតុគីមីពុលរាប់ពាន់ប្រភេទផ្សេងទៀតដែលមានក្នុងបារី និងផ្សែងបារីមិនត្រឹមតែធ្វើឲ្យម៉ាក់ៗកើតជំងឺច្រើនមុខទេ អាចធ្វើកូនក្នុងពោះប្រឈមនឹងបញ្ហាសុខភាពទាំងនៅពេលពោះ និងក្រោយពេលសម្រាល ដោយការបឺតស្រូបផ្សែងបារីតាមរយៈទងសុក ដូចជាដំណើរការមុខងាររបស់សុកមិនបានល្អ អាចធ្វើឲ្យកូនរលូត កើតមុនកំណត់ កូនលូតលាស់មិនល្អ មិនគ្រប់គីឡូ-មិនគ្រប់លក្ខណៈ មានបញ្ហាផ្លូវដង្ហើម សួត ឬកើតមកស្លាប់។
៣. ហាមញុាំគ្រឿងស្រវឹង
ជាតិអាល់កុលដែលមាននៅក្នុងគ្រឿងស្រវឹងមិនត្រឹមតែប៉ះពាល់ដល់សុខភាពម្តាយនោះទេ ថែមទាំងប៉ះពាល់ការលូតលាស់របស់ទារកក្នុងផ្ទៃទៀត ក្នុងនោះកូនកើតមកអាចមិនគ្រប់គីឡូ មានបញ្ហាអាកប្បកិរិយា-ការរៀនសូត្រជាដើម។
៤. ហាមញ៉ាំគ្រឿងសមុទ្រមានជាតិបារ៉តខ្ពស់
គ្រឿងសមុទ្រជាប្រភពដ៏សំខាន់នៃប្រូតេអ៊ីន និងអាស៊ីដខ្លាញ់អូមេហ្កា៣ ដែលអាចជួយដល់ការលូតលាស់ខួរក្បាល និងភ្នែកទារកក្នុងផ្ទៃ។ ទោះបីជាបែបនេះក្តី ស្ត្រីមានផ្ទៃពោះត្រូវគួរចៀសវាងនូវត្រីសមុទ្រមួយចំនួនដូចជា ត្រីឆ្លាម ត្រីដាវ ដែលមានជាតិបារ៉តខ្ពស់ ធ្វើឲ្យប៉ះពាល់កូនក្នុងផ្ទៃ។
ដកស្រង់ពី៖ Hello Health Group
