រវាងសម្រាលកូនដោយធម្មជាតិ និងដោយវះកាត់ តើមួយណាជាជម្រើសល្អ?
ការសម្រាលកូនតាមធម្មជាតិ ស្រីៗត្រូវទ្រាំទ្រនឹងការឈឺពោះរយៈពេលយូរ ខណៈការសម្រាលដោយវះកាត់វិញ ម៉ាក់ៗមិនចាំបាច់រង់ចាំដល់ពេលឈឺពោះនោះទេ ត្រឹមតែគ្រប់ខែ អាចសម្រាលបានហើយ។
ការសម្រាលកូនដោយធម្មជាតិល្អជាងវះកាត់ តែបើធម្មជាតិទៅមិនរួច យើងកុំជំទាស់ កុំប្រឆាំង ក្នុងករណីកូនអត់បង្វិល កូនទទឹងពោះ សុកពាំងមាត់ស្បូន ម្តាយមានកម្ពស់ទាប អាងត្រគាកមិនល្អ សុខភាពកូន និងម្តាយខ្សោយ ម្តាយធ្លាប់សម្រាលដោយវះកាត់ពីមុន សម្ពាធឈាមឡើងខ្ពស់ និងមានជំងឺទឹកនោមផ្អែម ត្រូវតែសម្រាលកូនដោយវះកាត់ហើយ។
ខាងក្រោមនេះជាគុណសម្បត្តិ-គុណវិបត្តិ នៃការសម្រាលកូនដោយវះកាត់ និងតាមធម្មជាមានដូចជា៖
១. ការសម្រាលកូនដោយធម្មជាតិ
គុណសម្បត្តិ
- ម្តាយអាចដើរ ឬធ្វើសកម្មភាពផ្សេងៗបានក្រោយសម្រាលកូនប៉ុន្មានម៉ោង
- បាត់បង់ឈាមតិច
- គ្មានការឈឺចាប់ដែលបន្សល់ដូចវះកាត់ឡើយ
- សម្រាកនៅពេទ្យរយៈពេលខ្លី
- មុខរបួសឆាប់ជាសះស្បើយ និងគ្មានស្នាម។
គុណវិបត្តិ
- ឈឺពោះយូរ ម្តាយត្រូវទ្រាំទ្រនឹងការឈឺពោះ
- អាចប្រឈមមុខជំងឺនោមទាស់ ឬជំងឺស្រុតស្បូន
- ទ្វារមាសអាចដាច់រហែកដោយសារការសម្រាល
- រាងកាយទារក អាចមានប៉ះទង្គិចនៅពេលម៉ាក់ៗប្រឹងសម្រាល ឬការប្រើឧបករណ៍ជំនួយផ្សេងៗ។
២. ការសម្រាលដោយវះកាត់
គុណសម្បត្តិ
- មិនឈឺពោះយូរ
- កូនកើតចំថ្ងៃ ឬម៉ោងដែលយើងចង់បាន
- កាត់បន្ថយឱកាសឆ្លងជំងឺពីម្តាយទៅកូន។
គុណវិបត្តិ
- បាត់បង់ឈាមច្រើន
- ចាក់ថ្នាំស្ពឹកទៅមិនស្ពឹក អាចមានប្រតិកម្មនឹងថ្នាំស្ពឹក ធ្វើឲ្យឈឺក្បាល វិលមុខក្អួត
- ធ្លាក់ឈាមច្រើនក្រោយសម្រាល
- ឆ្លងរោគ រលាកស្រទាប់ក្នុងស្បូន
- ខ្សោយស្បូន
- ត្រូវសម្រាកពេទ្យយូរ ទម្រាំមុខរបួសធូរស្រាល
- អាចវះកាត់កូនក្រោយៗទៀត
- មានស្នាមនៅលើពោះ ប្រឈមនឹងការដាច់ថ្នេរ បើមិនប្រយ័ត្ន។
ដកស្រង់ពី៖ Hello Health Group
