ពពោះត្រូវដឹង! ពេលឆ្លុះអេកូម្តងៗ ម៉ាក់ៗត្រូវមើលលើ ៣ ចំណុចសំខាន់ៗនេះ
នៅពេលពពោះ យើងមិនអាចដឹងទេថា កូននៅក្នុងផ្ទៃ មានសុខភាពល្អ ឬមិនល្អ បានដោយភ្នែកទទេឡើយ លុះត្រាតែពិនិត្យអេកូសាស្ត្រ ទើបអាចដឹងពីសុខភាពកូនបាន។ ជាទូទៅ នៅពេលពិនិត្យអេកូសាស្ត្រដើម្បីឲ្យដឹងពីសុខភាពកូន។
នៅលើបណ្ដាញសង្គមរបស់មន្ទីរពេទ្យ កាល់ម៉ែត បានឲ្យដឹងថា ការពិនិត្យអេកូទារកក្នុងផ្ទៃសំខាន់ណាស់ មិនអាចខ្វះបាន សម្រាប់ការអនុវត្តជាក់ស្ដែងនៅផ្នែកសម្ភព។
នៅពេលពិនិត្យមើលអេកូសាស្ត្រទារកក្នុងផ្ទៃ គឺត្រូវទាមទារឲ្យពិនិត្យទៅលើ៣ចំណុចសំខាន់ៗដូចជា៖
១. ពិនិត្យដើម្បីរកអាយុគភ៌ និងកាលបរិច្ឆេទគ្រប់ខែ
ស្ត្រីមានផ្ទៃពោះទាំងអស់ ចាំបាច់គួរពិនិត្យនៅពេលគភ៌មានអាយុពី ១១ ទៅ១៩សប្ដាហ៍ ជាការពិនិត្យដែលផ្ដល់ភាពច្បាស់លាស់ជាងគេ ហើយម៉ាក់ៗត្រូវចងចាំនូវកាលបរិច្ឆេទគ្រប់ខែរហូតដល់ពេលសម្រាលកូន។
២.ពិនិត្យកាយសម្បទាទារកក្នុងផ្ទៃ
ម៉ាក់ៗពពោះគួរពិនិត្យនៅសប្ដាហ៍ទី២២ ដល់ ២៤ ជាពេលវេលាសមស្របដែលអាចឲ្យយើងពិនិត្យបានងាយស្រួល ព្រោះសរីរាង្គទារកធំល្មម និងបរិស្ថានជុំវិញទារកមានសភាពស្រឡះល្អ។ ការពិនិត្យមុន ឬក្រោយពេលសប្ដាហ៍ទី២២ ដល់សប្ដាហ៍ទី២៤ មានលក្ខណៈពិបាក និងមិនសព្វជ្រុងជ្រោយ។ ៨០%នៃជំងឺរបស់ទារកក្នុងផ្ទៃ ត្រូវបានពិនិត្យឃើញ ដោយសារការធ្វើអេកូសាស្ត្រនេះឯង។
៣.ពិនិត្យវាយតម្លៃការសម្រាល
ការពិនិត្យអេកូត្រូវធ្វើឡើងនៅចន្លោះពី៣២-៣៤សប្ដាហ៍ ព្រោះអាចឲ្យយើងដឹងពីទម្រង់ ទំហំ ទម្ងន់របស់ទារក ទីតាំងសុក និងបរិមាណទឹកភ្លោះដែលមានទំនាក់ទំនងយ៉ាងជិតស្និទ្ធទៅនឹងលទ្ធភាពនៃការសម្រាលកូន។
ការពិនិត្យអេកូធ្វើឡើងយ៉ាងតិច៣ដង អំឡុងពេលពពោះរហូតដល់គ្រប់ខែ ក្នុងករណីការវិវត្តន៍របស់ផ្ទៃពោះធម្មតា ផ្ទុយពីនេះ ការពិនិត្យអេកូត្រូវធ្វើឡើងបន្ថែមទៀត តាមការតាមដានរបស់គ្រូពេទ្យជំនាញ ទៅតាមករណីដែលបានជួបប្រទះ។ ក្នុងការពិនិត្យអេកូមិនមានផលប៉ះពាល់ដល់សុខភាពម្ដាយ និងទារកឡើយ
ដកស្រង់ពី៖ Hello Health Group
