អ្នកម៉ាក់ត្រូវដឹង! បើកូនចេញរោគសញ្ញាទាំងនេះ អាចជាអាលែកហ្ស៊ីនឹងអាហារហើយ
ប៉ាម៉ាក់ធ្លាប់ដឹងអត់ថាអាហារមួយចំនួនអាចអាលែកហ្ស៊ីជាមួយកូនយើងបាន។ ដូចនេះហើយប៉ាម៉ាក់ត្រូវយកចិត្តទុកដាក់ នឹងរោគសញ្ញាមួយចំនួន ព្រោះថាបើអូនៗនៅតូច គឺមិនអាចប្រាប់យើងពីអាការៈបានច្បាស់នោះដែរ។
ខាងក្រោមនេះយើងនឹងបង្ហាញអំពីចំណេះដឹងល្អៗដែលអ្នកម៉ាក់មានកូនតូចមិនគួររំលង៖
១. រោគសញ្ញាអាលែកហ្ស៊ីអាហារមានអ្វីខ្លះ?
បើអូនៗមានបញ្ហាអាលែកហ្ស៊ីជាមួយនឹងអាហារ រោគសញ្ញានឹងចេញភ្លាមៗដែរ អាចថាតែប៉ុន្មាននាទីបន្ទាប់ពីញ៉ាំអាហារ ទៅកន្លះម៉ោង ឬតិចជាងពីរម៉ោង។ ពេលកូនយើងមានបញ្ហានេះ រោគសញ្ញាមួយចំនួនដូចជាក្អួត តឹងច្រមុះ ហៀរសម្បោរ និងប្រតិកម្មនៅលើស្បែករមាស់ ចេញកន្ទាលត្រអាក ដកដង្ហើមញាប់ៗ ហើមអណ្ដាត និងបបូរមាត់ ក៏អាចកើតមានឡើងដែរ ហើយពេលខ្លះក៏អាចមានអាការៈរាករូសដែរ។
ពេលខ្លះកូនយើងមិនអាចរៀបរាប់ពីរោគសញ្ញានៃអាលែកហ្ស៊ីបានទេ ដូចនេះប៉ាម៉ាក់អាចសួរនាំកូន ឬក៏កូនអាចរៀបរាប់ចំណុចមួយចំនួនដូចជា៖
- អូនៗថាមានអ្វីជាប់នៅបំពង់ក
- អូនៗថាអណ្ដាតរីកធំ និង
- រមាស់មាត់
២. អាហារណាខ្លះអាចធ្វើឲ្យក្មេងអាលែកហ្ស៊ី?
អាហារដែលអាចធ្វើឲ្យក្មេងអាលែកហ្ស៊ី ភាគច្រើនគឺមានស៊ុត ពពួកសណ្ដែក ទឹកដោះគោ និងល្ង ខណៈមនុស្សធំៗវិញច្រើនអាលែកហ្ស៊ីនឹងពពួកបង្គារ ឬបង្កង ជាដើម។
៣. ពេលណាត្រូវប្រញាប់បញ្ជូនកូនទៅមន្ទីរពេទ្យ?
ប៉ាម៉ាក់ត្រូវចេះសង្កេត បើឃើញថាកូនយើងចេញរោគសញ្ញាទាំងនេះ ត្រូវប្រញាប់បញ្ជូនកូនទៅមន្ទីរពេទ្យ៖
- ពិបាកដកដង្ហើម
- ពិបាកលេបអាហារ
- ឈឺទ្រូង
- វង្វេង
- ជីពចរខ្សោយ
- បាត់ស្មារតី ឬសន្លប់ និង
- ស្បែកប្រែជាពណ៌ខៀវ ជាដើម។
ដកស្រង់ពី៖ Hello Health Group
