ហេតុអ្វីប្រជាជនខ្មែរដាក់ កន្ត្រៃ ឬកាំបិត លើក្បាលដំណេកកូនខ្ចី?
ជំនឿមួយដែលឮតៗគ្នារាល់ពេលស្ត្រីដែលឆ្លងទន្លេរួច ភាគច្រើនគេតែងសង្កេតឃើញទំនៀមទម្លាប់មួយរបស់ប្រជាជនខ្មែរគឺតែងយក កន្ត្រៃ ឬកាំបិតទៅដាក់លើក្បាលដំណេកកូនខ្ចីនៅពេលដេក។ តើអ្នកទាំងអស់គ្នាដឹងអត់ថាហេតុអ្វីគេធ្វើបែបនេះ?
វាជារឿងមួយដែលកើតចេញពីបងស្រីខ្ញុំផ្ទាល់ ដែលសព្វថ្ងៃបងស្រីរបស់ខ្ញុំមានកូនប្រុសអាយុបាន15ថ្ងៃហើយ តែអ្វីដែលខ្ញុំសង្កេតឃើញនោះគឺបងស្រីរបស់ខ្ញុំគាត់បានដាក់ កន្ត្រៃលើក្បាលដំណេកកូនប្រុសតាំងពីគេកើតមក។ បងស្រីរបស់ខ្ញុំបានបញ្ជាក់ថា រាល់ពេលដែលកូនគេងភ្ញាក់ៗ និងយំខុសធម្មតា គាត់តែងដាក់កន្ត្រៃលើក្បាលដំណេករបស់កូនទៅតាមសម្ដីរបស់ម្ដាយបានប្រាប់ ចឹងមានន័យថាពេលខ្ញុំនឹងបងស្រីពេលនៅតូចអ្នកម្តាយតែងតែប្រើវិធីនេះដូចគ្នា។
ជាការពិតណាស់មានលោកយាយម្នាក់ដែលរស់នៅក្នុងស្រុកភូមិកំណើតរបស់ម្តាយខ្ញុំ គាត់បានបញ្ជាក់ប្រាប់ទៀតថា៖ “…ឮអ្នកចាស់បុរាណៗនិយាយថា ដាក់ទៅកុំឲ្យព្រាយ ឬក៏បិសាចអីមកបន្លាច ឬពញ្ញាក់អីចឹងណាស់ កុំឲ្យគាត់(កូន)ខ្លាច ដើម្បីការពារខ្លួនគាត់ហ្នឹង”។
ចុះប្រិយមិត្តអ្នកអានវិញមានមតិយ៉ាងណាដែរលើអបិយជំនឿនេះ?
អត្ថបទពី៖ មាន រតនា
