កូនក្នុងផ្ទៃស្រីឬប្រុស! ការពិត និងជំនឿមិនត្រឹមត្រូវ ដែលកំពុងតែពេញនិយម
ការដែលអាចបង្កើតគ្រួសារបាន គឺជារឿងដែលភ្ញាក់ផ្អើលណាស់សម្រាប់ស្ត្រីគ្រប់រូប។ រឿងមួយដែលកាន់តែសប្បាយចិត្តថែមទៀត គឺការមានផ្ទៃពោះ ហើយដឹងថាកូនភេទអី។ ទោះបីជាយ៉ាងណាក៏ដោយ អ្នកត្រូវដឹងពីជំនឿមិនត្រឹមត្រូវ និងការពិត ពីការសម្គាល់ភេទរបស់កូន ក្នុងផ្ទៃ។ ស្ត្រីភាគច្រើនដឹងថា ពួកគេកំពុងតែមានផ្ទៃពោះជាកូនស្រី ឬប្រុស គឺផ្អែកទៅលើរឿងច្រើនដូចជា អាហារដែលពួកគេកំពុងតែញ៉ាំ ឬសភាពស្បែក និងសក់។
គ្រូពេទ្យនិយាយថា រឿងទាំងអស់ខាងលើ ដែលប្រើដើម្បីសម្គាល់ភេទរបស់ទារកក្នុងផ្ទៃ គឺជារឿងដំណាលចាស់ៗបុរាណប៉ុណ្ណោះ ឬអាចនិយាយថា ជាជំនឿមិនត្រឹមត្រូវ។
ខាងក្រោមនេះគឺជាជំនឿមិនត្រឹមត្រូវដ៏ពេញនិយមបំផុតអំពីការសម្គាល់ភេទរបស់កូនក្នុងផ្ទៃ៖
១. ឃ្លានអាហារ
ស្ទើរតែ ៩០ភាគរយហើយនៃស្ត្រីមានផ្ទៃពោះ មានអាការឃ្លានអាហារ ហើយប្រភេទនៃការញ៉ាំអាហារវិញក៏អាចប្រែប្រួលច្រើនដែរ។ ជាអកុល រឿងនេះមិនមែនជាការពិតទេ ក្នុងការសម្គាល់ភេទរបស់ទារកក្នុងផ្ទៃ។ គេជឿថា ស្ត្រីមានផ្ទៃពោះជាកូនប្រុស គឺឃ្លានតែអាហារប្រៃៗ។ បើសិនជាគេឃ្លានរបស់ផ្អែមៗ មានន័យថា ទារកក្នុងផ្ទៃគឺភេទស្រី។
២. អារម្មណ៍មិនល្អ
វាគឺជារឿងញឹកញាប់មួយ សម្រាប់ស្ត្រីមានផ្ទៃពោះ មានអារម្មណ៍ប្រែប្រួលច្រើន។ រឿងនេះពិតប្រាកដខ្លាំង ក្នុងត្រីមាសដំបូង និងត្រីមាសចុងក្រោយ។ សម្រាប់ពាក្យចរចាមអារាមវិញនិយាយថា ស្ត្រីមានផ្ទៃពោះដែលមិនធ្លាប់មានអារម្មណ៍ប្រែប្រួលទេ គឺពរពោះកូនប្រុស ខណៈពេលដែលស្ត្រីដែលមានអាការអារម្មណ៍ប្រែប្រួលច្រើន ពរពោះកូនស្ត្រីវិញ។ អ្នកជំនាញនិយាយថា អារម្មណ៍ប្រែប្រួលបង្កឡើងដោយកត្តាច្រើនណាស់ ដូចជាបម្រែបម្រួលអ័រម៉ូន និងស្ត្រេស ហើយក៏មិនមែនកើតឡើងដោយភេទរបស់ទារកក្នុងផ្ទៃដែរ។
៣. ជំហររបស់ពោះដែលធំទៅៗ
កត្តាច្រើនណាស់ ដែលកំណត់ទៅលើទំហំ និងរូបរាងរបស់ពោះ ដូចជាទំហំរបស់ទារក ព្រមទាំងជំហររបស់គេផងដែរ។ គ្មាននរណាអាចកំណត់ដឹង ពីភេទរបស់ទារកក្នុងផ្ទៃ ដោយផ្អែកទៅលើទំហំពោះតែមួយមុខឡើយ។ គេនិយាយថា កាលណាទំហំពោះកាន់តែទាប នោះទារកកំពុងតែលូតលាស់នោះ គឺជាភេទប្រុស។ ម្យ៉ាងវិញទៀត មនុស្សជាច្រើនជឿថា បើសិនជាទំហំពោះឡើងមកលើខ្ពស់ គឺជាសញ្ញាច្បាស់មួយបញ្ជាក់ថា ទារកនោះគឺភេទស្រី។ តាមការសិក្សាក្នុងឆ្នាំ១៩៩៩ បានធ្វើការសនិ្នដ្ឋានថា ស្ត្រីដែលប្រើប្រាស់ទំហំ រូបរាង និងជំហររបស់ពោះ ក្នុងការទាយលើភេទរបស់ទារក គឺជារឿងដែលមិនត្រឹមត្រូវឡើយ។
៤. សក់ និងស្បែក
យោងទៅតាមបម្រែបម្រួលអ័រម៉ូនជាច្រើន ដែលកើតឡើងក្នុងរាងកាយស្ត្រីមានផ្ទៃពោះ វាក៏អាចមានការប្រែប្រួលច្រើនមួយចំនួន ទៅលើរូបរាងរបស់នាងដែរ ជាពិសេសស្បែក និងសក់តែម្តង។ មនុស្សជាច្រើនជឿថា ស្ត្រីដែលមិនធ្លាប់មានការប្រែប្រួលច្រើន ទៅលើស្បែក និងសក់ របស់អ្នកនឹងមានកូនស្រី។ ប៉ុន្តែបើសិនជានាងកើតមុន និងស្បែកស្រអាប់ ព្រមទាំងខូចសក់ច្រើន។ មានន័យថា នាងប្រហែលជាមានកូនប្រុសហើយ។ ជាថ្មីម្តងហើយ រាល់ការអតុល្យភាពអ័រម៉ូនទាំងនេះ គឺមិនអាចប្រើដើម្បីបញ្ជាក់អំពីភេទរបស់ទារកបានឡើយ។
អ្នកជំនាញជាច្រើននិយាយថា ខាងក្រោមនេះគឺជាមធ្យោបាយតែមួយគត់ដែលអាចទាយដឹងអំពីភេទរបស់ទារកបានយ៉ាងសុក្រិត នោះគឺ តេស្តឈាម ថតអេកូ ការបូមទឹកភ្លោះទៅពិនិត្យ និងការធ្វើតេស្តទៅលើសុក (Chorionic Villus Sampling) ៕
ដកស្រង់ពី៖ health.com
