ពពោះស្បែកប្រែជាខ្មៅស្រអាប់ ឡើងស្នាមអុចៗ ដោយសារអ្វី? គួរដោះស្រាយបែបណា?
ស្រីៗគ្នាយើងភាគច្រើនពិតជាធ្លាប់ជួបបញ្ហាស្បែកអំឡុងពេលពពោះមិនខាន។ ស្រីៗយើងធ្លាប់សង្កេតឃើញថាសម្រស់ខ្លួនឯងធ្លាក់ចុះ ពិសេសគឺស្បែកប្រែជាស្រអាប់ ខ្មៅ មិនភ្លឺរលោងដូចគ្រាមុនឡើយ អាចនឹងមានឡើងដុំពក ឬកន្ទួលស្បែក ដែលទាំងនេះ គេហៅថា បញ្ហាប្រែពណ៌ស្បែកអំឡុងពេលពពោះ។
តើបណ្តាលមកពីមូលហេតុអី គួរធ្វើម៉េច? ការពារដោយវិធីណា?
អត្ថបទមួយនេះអាចបញ្ជាក់បានខ្លះៗដែលអ្នកម៉ាក់គួរយល់ដើម្បីការពារឬដោះស្រាយដូចខាងក្រោម៖
១. បញ្ហាប្រែពណ៌ស្បែកអំឡុងពេលពពោះកើតឡើងពេលណាប្រាកដ?
ប្រែពណ៌ស្បែក គឺជាបញ្ហាឧស្សាហ៍កើតមានបំផុត និងអាចកើតឡើងគ្រប់ដំណាក់ទាំងអស់ពេលពពោះ ហើយប៉ះពាល់ចំពោះស្រីៗពពោះដល់ទៅ ៩០%។ ហេតុនេះ សូមកុំគិតថា មានតែយើងម្នាក់ដែលជួបបញ្ហានេះឲ្យសោះ ហើយត្រូវដឹងថា បញ្ហាស្បែកប្រែពណ៌អាចនឹងកើតឡើងនៅត្រីមាសទី៣ នៃការពពោះ ហើយជាទូទៅស្បែកយើងមិនប្រែពណ៌ភ្លាមៗនោះទេ តែវាកើតឡើងបណ្តើរៗទៅតាមការវិវត្តនៃផ្ទៃពោះរបស់យើង។
បញ្ហាស្បែកប្រែពណ៌ពេលពពោះជាទូទៅវានឹងធ្វើឲ្យឡើងពណ៌ក្រហមនៅលើបាតដៃ និងបាតជើង ដែលជាការវិវត្តធម្មតាសម្រាប់ស្រីៗកំពុងពពោះ។
ស្រីៗមានស្បែកខ្មៅស្រាប់ ក៏អាចឃើញមានការប្រែប្រួលអំឡុងពេលពពោះ ច្រើនជាងស្រីៗស្បែកសទៅទៀត ប៉ុន្តែទោះបីជាស្បែកយើងមើលទៅយ៉ាងម៉េចក៏ដោយ ស្នាមទាំងនោះនឹងបាត់ទៅវិញក្រោយសម្រាលរួច។
២. អ្វីជាមូលហេតុបណ្តាលឲ្យប្រែពណ៌ស្បែក?
មូលហេតុចម្បងនាំឲ្យប្រែពណ៌ស្បែកអំឡុងពេលពពោះ គឺបម្រែបម្រួលអ័រម៉ូនតែម្តង ខណៈក្រុមអ្នកជំនាញផ្នែកសម្ភពជាច្រើនលើកឡើងថា វាក៏មានទំនាក់ទំនងជាមួយចំណង់អាហារអំឡុងពេលពពោះ ដែលខុសពីធម្មតាដូចគ្នា។
៣. មានបញ្ហាប្រែពណ៌ស្បែកពេលពពោះត្រូវធ្វើម៉េច?
គ្មានវិធីសាស្ត្រជាក់លាក់ដែលអាចជួយការពារបញ្ហាបម្រែបម្រួលអ័រម៉ូនអំឡុងពេលពពោះនោះឡើយ ប៉ុន្តែយើងនៅតែអាចសាកល្បងវិធីសាស្ត្រមួយចំនួនដូចជាការពារកុំឲ្យត្រូវកាំរស្មី UV ដែលជាមូលហេតុមួយនាំស្បែកឆាប់ខ្មៅ ដូចជា៖
- ឃ្លុំស្បែកឲ្យជិត៖ ការប៉ះពាល់ជាមួយកម្តៅថ្ងៃច្រើនពេក នឹងធ្វើឲ្យបញ្ហាស្បែកប្រែពណ៌កាន់តែខ្មៅខ្លាំង បើទោះជាយើងប្រើឡេការពារកម្តៅថ្ងៃក៏ដោយ។ ពេលចេញក្រៅត្រូវពាក់មួកដែលអាចបាំងពន្លឺថ្ងៃទាំងផ្នែកក និងមុខបានល្អ។
- បើមានបញ្ហាឡើងអុចៗស្បែក៖ អាចប្រើឡេការពារកម្តៅថ្ងៃ ដែលមានសារធាតុ SPF 30 ឬខ្ពស់ជាងនេះជាប្រចាំ ទោះជាពេលមិនចេញទៅក្រៅក៏ដោយ។ កាំរស្មីព្រះអាទិត្យមួយចំនួន អាចជះចូលតាមបង្អួច និងប៉ះពាល់ដល់ស្បែករបស់យើងបាន ត្រូវតែប្រយ័ត្នរឿងនេះដូចគ្នា។
- ញ៉ាំអាស៊ីដហ្វូលីកឲ្យបានគ្រប់គ្រាន់៖ អ្នកជំនាញជាច្រើនជឿថា បញ្ហាប្រែពណ៌ស្បែក មានទំនាក់ទំនងជាមួយកង្វះអាស៊ីដហ្វូលីកក្នុងរាងកាយ។
ដកស្រង់ពី៖ Hello Health Group
