ជាការពិតឬទេ? ពេលពពោះ ម៉ាក់ៗញ៉ាំពងក្ងានកូនកើតមកឆ្លាត ពូកែ
ប្រជាជនខ្មែរយើងជាច្រើនតែងនិយាយ និងអនុវត្តតគ្នាពីជំនឿនៃការញ៉ាំពងក្ងាន ថាអាចជួយឲ្យកូនមានភាពឆ្លាតវៃបាន ហើយប៉ុន្មានឆ្នាំចុងក្រោយនេះស្រីៗកំពុងមានផ្ទៃពោះចាប់ផ្ដើមញ៉ាំពងមួយប្រភេទទៀត គឺពងអូទ្រីសនាំចូលពីបរទេស។
តើការញុំាពងក្ងានធ្វើឪ្យកូនឆ្លាតមេនទេ?
ដើម្បីឲ្យកាន់តែជ្រាបច្បាស់យើងនឹងធ្វើការបកស្រាយដូចខាងក្រោម៖
មិនថាពងមាន់ ទា ក្ងាន អ្វីទេសុទ្ធតែល្អ និងសម្បូរទៅដោយជាតិប្រូតេអ៊ីនដែលស្ត្រីចាំបាច់ត្រូវការទៅចិញ្ចឹមសរីរាង្គ។ ក្រៅពីប្រូតេអ៊ីន ស៊ុតក៏សម្បូរជាតិកូលីនដែលជួយទ្រទ្រង់សុខភាពម្តាយ និងការវិវត្តខួរក្បាលរបស់ទារកក្នុងផ្ទៃ។ ប៉ុន្តែគ្រូពេទ្យតែងតែណែនាំម៉ាក់ៗឲ្យញ៉ាំស៊ុតឆ្អិន ហើយស៊ុតឆៅគួរចៀសវាង ព្រោះអាចមានមេរោគមួយចំនួនប៉ះពាល់ទាំងម៉ាក់ និងកូន។
ការញ៉ាំពងក្ងាន អូទ្រីស កូនឆ្លាតនោះ វាមិនពិតប្រាកដនោះទេ ដោយលើកឡើងថា ស៊ុតទាំងអស់សុទ្ធតែមានអត្ថប្រយោជន៍ដូចគ្នា គ្រាន់តែពងមាន់ ពងទា វាតូចជាង និងមានតម្លៃថោក ហើយបើពងអូទ្រីសជារបស់កម្រ។
ឧទាហរណ៍៖ អ្នកនៅតាមទីជនបទដាច់ស្រយាលញ៉ាំតែពងគ្រួច កូនក៏នៅតែឆ្លាតនោះ បែបនេះមកពីអីវិញ ពោលគឺញ៉ាំពងសត្វអ្វីក៏ល្អដូចគ្នា។
សារៈប្រយោជន៍ នៃពងក្ងាន៖
- ពងក្ងាន សម្បូរសារធាតុចិញ្ចឹម ដូចជា ប្រូតេអ៊ីន ខ្លាញ់ វីតាមីន និងសារធាតុរ៉ែ
- ពងក្ងាន មានផ្ទុកវីតាមីន A, D, E វីបូហ្លាវីន ថ្យាមីន ជាតិដែក ផូស្វ័រ និងកាល់ស្យូម
- កូលីន (Choline) ៖ ពងក្ងានមួយ មានជាតិកូលីនប្រហែល ៣៧៩ មីលីក្រាម (កូលីន មានតួនាទីយ៉ាងសំខាន់ ក្នុងការលូតលាស់នៃកោសិកា)
- ពងក្ងាន ជួយដល់ការលូតលាស់ របស់ខួរក្បាល និងកោសិកាសរសៃប្រសាទ។
- វីតាមីន និងសារធាតុចិញ្ចឹមល្អៗទាំងនេះហើយ ដែលជាមូលហេតុ អាចនាំឲ្យកូនរបស់អ្នក មានសុខភាពល្អ និងឆ្លាតវៃ។ យ៉ាងណាមិញ បងប្អូនអាចញ៉ាំពីរបីគ្រាប់ទៅ កុំឲ្យស្តាយក្រោយ។
ប្រការគួរប្រុងប្រយ័ត្ន៖
- បើអ្នកមិនអាចទ្រាំ នឹងរសជាតិវាបានទេ ចូរកុំបង្ខំញ៉ាំវាអី អ្នកអាចញ៉ាំពងមាន់ ឬពងទាបានដូចគ្នា
- ពងក្ងាន មានកូលេសស្តេរ៉ុលខ្ពស់ ដូច្នេះ ស្ត្រីជាម្តាយគួរមានការប្រុងប្រយ័ត្ន ហើយយកល្អ គួរពិភាក្សាជាមួយគ្រូពេទ្យជំនាញ៕
សរុបមក៖ លោកវេជ្ជបណ្ឌិតក៏បានបន្ថែមទៀតថា ការនិយមញ៉ាំពងក្ងាន ពងអូទ្រីស សម្រាប់គ្រួសារទំនើបស៊ីវិល័យ ឬកូនអ្នកមានៗប៉ុណ្ណោះ ហើយគុណសម្បត្តិវាមិនខុសពីពងមាន់ ទា ក្រួច អ្វីនោះទេ តែបើយើងចង់ប្លែក និងមានថវិកាញ៉ាំក៏មិនខុសដែរ។
ដកស្រង់ពី៖ Hello Health Group
