មិនបាច់ភ័យទេ! ម៉ាក់ៗពពោះធ្វើបាន ៧ចំណុចនេះកូនលូតលាស់ណាស់

ជាទូទៅ ក្មេងក្រិនគឺដោយសារតែពួកគេជួបបញ្ហាលូតលាស់តាំងតែពីនៅក្នុងពោះម្តាយមកម៉្លេះ ដែលក្នុងនោះអាចដោយម្តាយមិនបានផ្តល់សារធាតុចិញ្ចឹម និងវីតាមីនគ្រប់គ្រាន់ ពិសេសគឺទៅលើរបបអាហារដែលអ្នកម្តាយទទួលទានតែម្តង។​ ហើយវាក៏បូករួមទាំងក្រោយពេលអូនតូចសម្រាលផងដែរ។

ជាមួយគ្នានេះដែរក្នុងអត្ថបទនេះ នឹងបង្ហាញអ្នកអំពីរឿងទាំងដែលម្តាយត្រូវធ្វើអំឡុងពេលពពោះ ដើម្បីឱ្យកូនកើតមកមានសុខភាពល្អ មិនក្រិន និងមានកម្ពស់ខ្ពស់៖

១. ទទួលអាហារូបត្ថម្ភឱ្យបានគ្រប់គ្រាន់
អ្នកម្តាយត្រូវប្រាកដថាខ្លួនទទួលបានអាហាររូបត្ថម្ភគ្រប់គ្រាន់ ពីអាហារដែលបរិភោគប្រចាំថ្ងៃ ដែលមាន អាស៊ីតហ្វូលិក កាល់ស្យូម ជាតិដែក វីតាមីន D និងប្រូតេអ៊ីន។ បន្ថែមពីនេះ អ្នកម្តាយក៏ត្រូវផឹកទឹកឱ្យបានច្រើនផងដែរ ដើម្បីការពាររាងកាយពីការខ្សោះជាតិទឹក។

២. លេបថ្នាំគ្រាប់មុនពេលសម្រាល
ប្រសិនបើអ្នកម៉ាក់គិតថា មិនបានទទួលសាធាតុចិញ្ចឹមពីអាហារគ្រប់គ្រាន់ទេ គួរញ៉ាំអាហារបំប៉នជំនួយ ដោយពិភក្សាជាមួយគ្រូពេទ្យ។ អាហារបំប៉នអាចផ្តល់អាស៊ីតហ្វូលិក វីតាមីន និងកាល់ស្យូមដល់អ្នកម្តាយបានគ្រប់គ្រាន់ ដើម្បីជំនួយដល់កូនក្នុងផ្ទៃ។

៣. ជៀសវាងជំងឺឆ្លង
​ជំងឺឆ្លង​មួយចំនួន​ចំពោះ​ស្ត្រី​មានគភ៌​ អាច​ប៉ះពាល់​ដល់​ទារក​ក្នុង​ផ្ទៃ​ ដូចជាខួរក្បាលចុះខ្សោយ និងក្រិន។ ដូច្នេះអ្នកម្តាយត្រូវមានអនាម័យខ្ពស់ ដើម្បីកុំឱ្យឆ្លងមេរោគ និងបាក់តេរីផ្សេងៗ។

៤. ហាមដាច់ខាតជក់បារី និងផឹកស្រា
មធ្យោបាយដ៏ល្អបំផុត ដើម្បីការពារការក្រិនចំពោះកុមារគឺបញ្ឈប់ការជក់បារី ការផឹកស្រា និងគ្រឿងញៀនមុនពេលមានផ្ទៃពោះ ឬអំឡុងពេលមានផ្ទៃពោះ ព្រោះវាមានជាតិពុលខ្ពស់ណាស់ដែលបំផ្លាញការលូតលាស់របស់កូន និងសុខភាពរបស់អ្នក។

៥. សម្រាក និងគេងឱ្យបានគ្រប់គ្រាន់
អ្នកម្តាយគួរសម្រាក និងគេង​ឱ្យបានគ្រប់គ្រាន់ ពី 7 ទៅ 9ម៉ោងដែលល្អសម្រាប់សុខភាពខ្លួន និងកូន ហើយទីតាំងគេងដែលល្អ គឺគេងផ្អៀងមកឆ្វេង។ បន្ថែមពីនេះ អ្នកម្តាយមិនត្រូវតានតឹង និងគិតច្រើនពេកទេ។

៦. ពិនិត្យសុខភាពជាប្រចាំ
អ្នកត្រូវពិនិត្យស្ថានភាពរបស់អ្នកទៅកាន់គ្រូពេទ្យឱ្យបានទៀងទាត់ ដើម្បី​ធានា​ថា​ទារក​មាន​ការ​វិវឌ្ឍ​ត្រឹមត្រូវ​តាម​អាយុ​គភ៌ និង​សារធាតុ​អ្វីខ្លះ​ដែល​ត្រូវ​បន្ថែម​។ គ្រូវពេទ្យក៏អាចជួយបាន ប្រសិនបើមានអ្វីមិនប្រក្រតី។

៧. ធ្វើសកម្មភាពរាងកាយជាប្រចាំ
អ្នកម្តាយមិនគួរនៅតែមួយកន្លែង ដោយមិនថ្វើអ្វីសោះនោះឡើយ។ រាងកាយមានសកម្មភាពត្រឹមត្រូវ ឈាមរត់បានរលូន ហើយលំហូរនៃសារធាតុចិញ្ចឹមទៅកាន់ស្បូនក៏នឹងប្រសើរឡើងផងដែរ ដើម្បីឱ្យទារកក្នុងផ្ទៃមានសុខភាពប្រសើរឡើង។

ជារួមមកវិញ ក្នុងអំឡុងពេលពពោះគឺសំខាន់ណាស់ ដូច្នេះអ្នកម្តាយត្រូវមានការប្រុងប្រយ័ត្ន និងទទួលទានរបបអាហារឱ្យបានត្រឹមត្រូវ ពិសេសគឺគេងឱ្យបានគ្រប់គ្រាន់ ព្រមទាំងរីករាយឱ្យបានច្រើន ដើម្បីជំនួយដល់សុខភាពខ្លួនឯង និងការលូតលាស់របស់អូនតូចក្នុងផ្ទៃ៕

ដកស្រង់ពី៖ HelloSehat