ប្រយ័ត្នគ្រោះថ្នាក់! បើកូនឈ្លក់ទឹកដោះពេលបៅ ម៉ាក់ៗត្រូវធ្វើបែបនេះ

ទឹកដោះម្តាយគឺជាអាហារមាសទីមួយ និងល្អបំផុតសម្រាប់កូន ដែលផ្តល់អត្ថប្រយោជន៍រាប់មិនអស់ដល់សុខភាពរាងកាយ និងការលូតលាស់ខួរក្បាលរបស់ទារក។ ដោយឡែកចំពោះការបំបៅដោះកូនវិញ ក៏ជារឿងងាយៗ និងធម្មតាដែរ ប៉ុន្តែអាចមានពេលខ្លះ អ្នកម៉ាក់អាចជួបបញ្ហាដូចជា អូនតូចមិនព្រមបៅ ឬឈ្លក់ទឹកដោះពេលកំពុងបៅជាដើម។

ដូច្នេះតើត្រូវធ្វើដូចម្តេចទៅ បើកូនកំពុងតែឈ្លក់ទឹកដោះពេលបៅ?

នៅពេលដែលកូនរបស់អ្នកកំពុងឈ្លក់ ឬស្លាក់ទឹកដោះគោ មានវិធីសង្គ្រោះបឋមដែលអាចប្រើ ដើម្បីកុំឱ្យទឹកដោះស្ទះផ្លូវដង្ហើមទារក។ ដោយសារទារកមានរាងកាយខ្ចី តម្រូវឱ្យអ្នកម៉ាក់ប្រុងប្រយ័ត្ន និងថ្នម។

ខាងក្រោម​នេះ​ជា​គន្លឹះ​ខ្លះៗ ​ដែលអ្នកម៉ាក់គួរធ្វើ ពេលអូនតូចឈ្លក់ទឹកដោះ៖

វិធីទី១
លើក​ទារក​ឡើង​ដោយ​ទ្រ​ក្បាល ហើយ​ដាក់ដៃនៅលើដើមទ្រូង​ទារក ដោយ​ពត់​ទៅមុខ​បន្តិច។ បន្ទាប់មកឱ្យនរណាម្នាក់ អាចជាលោកប៉ាដាក់ដៃលើ​ផ្ចិត ឬលើទ្រូង​ទារក ហើយ​រុញ​ចូលឱ្យថ្នម។ ត្រូវរុញឱ្យលឿន និងប្រុងប្រយ័ត្នបំផុត។

វិថីទី២
អាចដាក់ទារកឱ្យបែរខ្នងចុះក្រោម ហើយទះខ្នងតិចៗ និងរឺតទ្រូងថ្នមៗ ដើម្បីបើកផ្លូវដង្ហើម។ ត្រូវយកម្រាមដៃពីរ ឬបី រឺតថ្នមៗលើពាក់កណ្តាលខាងក្រោមនៃឆ្អឹងទ្រូង ស្របពេលដែលដៃម្ខាងទៀតត្រូវទ្រក្បាលទារក។  ធ្វើបែបនេះរហូតដល់ទារកបានប្រសើរឡើង និងបាត់ឈ្លក់។

បន្ថែមពីនេះ អ្នកម៉ាក់គួរតែបញ្ឈប់ការបំបៅមួយសន្ទុះ ទោះបីទារកបាត់ឈ្លក់ហើយក៏ដោយ ដើម្បីឱ្យមានដង្ហើមដើរល្អ និងបាត់ហត់សិន។

ចំណាំ៖ ប្រសិនបើធ្វើហើយ ទារកឈ្លក់មិនព្រមបាត់សោះ ឬដល់ថ្នាក់សន្លប់នោះ ប៉ាម៉ាក់ត្រូវត្រូវប្រញ៉ាប់នាំអូនតូច ទៅមន្ទីរពេទ្យភ្លាម ដើម្បីទទួលការជួយសង្គ្រោះពីគ្រូពេទ្យ៕

ដកស្រង់ពី៖ Firstcry Parenting